【年紀大，愛回帶】
懷緬過去根本係人嘅天性，根本就唔關戀殖事
人年紀越大，就越係覺得從前係最好。並不因為年青時候所處嘅環境特別美好，只係十廿幾歲嘅自己擁有看似無限青春。我阿公最鐘意回嗰餅帶就係毛主席嗰時乜乜乜，但係食樹皮書都無得讀喎！阿爺嗰餅帶就係蔣委員長點點點，搞到你做咗棄卒流落香港呢！雖然我未夠老，不過我嗰餅就可能係港英殖民地嘅最後嗰幾年同剛回歸全香港未識死嘅頭一兩年。
老老實實，回歸前嗰十年八載香港未必係最風光，但一定係最糜爛璀璨。當年真正嘅香港精英走得嘅走晒，剩低嘅就係一大堆炒樓發達嘅暴發戶同水鬼升城隍嘅中產。政治氣氛一啲都唔好，日日都係大陸同肥彭單單打打。
不過可能港英政府刻意型造一個極端言論自由嘅社會，又加上醉生夢死嘅中產同暴發戶唔洗用腦嘅消費，就令到個社會嘅娛樂消費生活非常精彩。對於當時我厘啲重係做仔，洗緊屋企錢嘅就更加開心同深刻。就係講行街，大丸，松板屋，三越，東急，Green Peace，British Colony，People are People，啲鋪頭點會好似依家重複又重複咁悶。
最好嘅電影都係响嗰時出現，因為乜嘢題材都拍得。〈英雄本色〉，〈阿飛正傳〉，〈表姐，你好嘢！〉，〈倩女幽魂〉，〈金枝玉葉〉，〈天若有情〉，〈賭神〉，〈賭聖〉，〈古惑仔〉，數都數唔完。
當年歌星就紅到依家幾十歲都無人取代到（其實幾慘），張國榮，譚詠麟，梅艷芳，四大天王，王菲，Beyond，達明，到後期嘅李克勤，黃凱芹，鄭秀文。唔好講依家已經無人唱K，就算去唱一年嘅新嘅廣東歌都唔夠當年嘅一個月多。
電視雖然來來去去都係無線，但係總係覺得出色嘅劇集出現率真係高喎。〈大時代〉，〈壹號皇庭〉，〈今生無悔〉，〈刑事偵緝檔案〉，連亞視都有〈千王之王重出江湖〉同〈我和殭屍有個約會〉。
一個為期好短，全個社會都自我麻醉極度消費嘅十年，可能就係我將來老咗最鐘意回憶嘅嗰一餅帶。嗰一種無理性，無思考，無前途嘅消費娛樂世界，我相信世間上好難再出現。
#斜陽無限
#無奈只一息間燦爛
#隨雲霞漸散
#逝去的光彩不復還
Search